Mourinho rekinn upp í stúku

Jose Mourinho var rekinn upp í stúku af Jonathan Moss dómara í leiknum gegn West Ham sem nú er í gangi í ensku úrvalsdeildinni.

Mourinho hefur oft lent upp á kant við dómara og gæti verið kominn í vandræði enn eina ferðina. Hann brjálaðist þegar Paul Pogba fékk gult frá Moss dómara fyrir leikaraskap og sagði nokkur vel valin orð. Dómarateymi leiksins lét hann ekki komast upp með munnsöfnuðinn og rak Mourinho beinustu leið upp í stúku þar sem hann þarf að horfa á leikinn.

Þaðan hefur hann svo komið skilaboðum til þjálfarateymisins á bekknum. Staðan í leiknum er 1-1 eftir að Diafro Sakho kom West Ham yfir á 2.mínútu en Zlatan Ibrahimovic jafnað fyrir heimamenn á 21.mínútu.

Leikurinn er í beinni útsendingu á Stöð 2 Sport HD.