Húsbréfum skipt í íbúðabréf

Eigendur húsbréfa og húsnæðisbréfa geta skipt bréfum sínum í íbúðarbréf til 1. júlí. Það hentar þeim sem nýtt hafa bréfin í sparnaðarskyni. Hallur Magnússon, sviðstjóri þróunar- og almannatengsla hjá Íbúðarlánasjóði, segir að verið sé að bjóða skipti á ákveðnum skiptikjörum. Þau verði aðeins í boði í þetta eina sinn. "Þeir sem hafa notað húsbréf til síns sparnaðar og þeir sem hafa fjárfest í þeim, eins og bankar, verðbréfasjóðir og lífeyrissjóðir, býðst að skipta húsbréfunum fyrir íbúðarbréf sem við teljum að verði markaðsvænni, seljanlegri og verðmeiri til lengri tíma," segir Hallur. "Greiningadeildir bankanna hafa bent á að með tímanum minnki það yfirverð sem er á húsbréfunum núna og þau verða því ekki eins seljanleg og þessi nýju íbúðabréf. Það er kjarni málsins í þessum skiptum." Hallur segir að vilji fólk kynna sér málið betur geti það haft samband við bankann sinn, sparisjóðinn eða verðbréfafyrirtæki sem það skiptir við og fengið leiðbeiningar.