Pakkar afhentir á morgun

Pakkar sem safnast hafa undir jólatré Kringlunnar, til Mæðrastyrksnefndar og Fjölskylduhjálpar Íslands verða afhentir á morgun klukkan 11 við jólatré Kringlunnar. Fulltrúar Kringlunnar, Bylgjunnar og Íslandspósts munu afhenda fulltrúum frá Mæðrastyrksnefnd Reykjavíkur og Fjölskylduhjálpar Íslands fyrstu pakkana sem safnast hafa undir jólatré Kringlunnar. Í tilkynningu frá Kringlunni segir orðrétt:  „Kringlan og Bylgjan í samstarfi við Íslandspóst standa fyrir árlegri pakkasöfnun, sem ber heitið PAKKAJÓL, undir jólatré Kringlunnar. Mæðrastyrksnefnd Reykjavíkur og Fjölskylduhjálp Íslands sjá svo um að koma pökkunum til þeirra sem á aðstoð þurfa að halda fyrir jólin - svo allir geti haldið gleðileg jól. Gestir Kringlunnar eru hvattir til að gefa "eina gjöf til viðbótar" við það sem þau kaupa og setja það undir jólatréð. Við jólatré Kringlunnar er hægt að pakka inn gjöfinni og einnig er þar að finna merkimiða sem merktir eru strák annars vegar og stelpu hins vegar og pláss er fyrir að merkja aldur barnsins sem pakkinn höfðar til. Þeir sem staddir eru úti landi og sjá sér ekki fært að koma í Kringluna fyrir jólin en vilja taka þátt í Pakkajólum og láta gott af sér leiða, er bent á að fara með pakkann á næsta pósthús. Íslandspóstur mun sjá um að koma pakkanum undir jólatréð í Kringlunni án endurgjalds. Síðasti dagur sem Íslandspóstur tekur á móti pökkum á landsbyggðinni er sunnudagurinn 19. desember - svo þeir skili sér í réttar hendur tímanlega. PAKKAJÓL hafa farið vel af stað, en betur má ef duga skal þar sem mikil erftirspurn er eftir pökkum hjá Mæðrastyrksnefnd og Fjölskylduhjálp Íslands. Kringlan, Bylgjan og Íslandspóstur hvetja landsmenn alla til að láta ekki sitt eftir liggja og hjálpa þeim sem á aðstoð þurfa að halda fyrir jólin með því að setja pakka undir jólatré Kringlunnar. Síðasti dagurinn sem tekið er á móti pökkum í Kringlunni er þriðjudagurinn 21. desember."