Hamborgarhryggur í rjúpnaleysinu

Íbúar Nausts, dvalarheimilis aldraðra á Þórshöfn á Langanesi, fá ekki rjúpurnar sínar þessi jólin frekar en flestir aðrir. Því verður hamborgarhryggur á borðum með tilheyrandi meðlæti. Í eftirrétt er heimalagaður ís ráðskonunnar. Sjö búa á Nausti sem stendur við Langanesveg eins og aðrar helstu stofnanir og fyrirtæki bæjarins. Tveir verja jólunum í heimahúsum en fimm á dvalarheimilinu. Jólahald á Nausti verður með hefðbundnum hætti, presturinn lítur inn um hádegisbilið og sest verður að borðum klukkan hálf sjö.