Telur Símann tilbúinn til sölu

Sérfræðingur sem vann að sölu þýska ríkissímans segir aðstæður til rekstrar Símans Klaus Dieter Schuerle sem tók þátt í einkavæðingu þýska ríkissímafyrirtækisins Deutsche Telekom telur miklu skipta að verkferlar og markmið í aðdraganda einkavæðingar séu skýr. Hann segir að langur undirbúningstími sé hins vegar ekki endilega heppilegur. Schuerle ræddi um einkavæðingu Deutsche Telekom á fundi Þýsk-íslenska verslunarfélagsins og Verslunarráðs Íslands í gær. Hann lýsti aðdraganda einkavæðingarinnar og sagðist almennt telja að mjög vel hefði tekist til. Langur undirbúningstími hefði hins vegar valdið vanda þar sem ýmislegt í rekstri fyrirtækisins hafi verið undir mikilli smásjá á því tímabili. Um einkavæðingu Símans á Íslandi segist Schuerle ekki getað sagt til um hvert sé líklegt verðmæti félagsins. "Það væri ekki viðeigandi að ég tjáði skoðun á því," segir hann. Hann segir hins vegar allt benda til þess að Síminn sé tilbúinn til þess að verða einkavæddur og að starfsaðstæður hér á landi séu mjög hagstæðar til fjarskiptarekstrar. Í einkavæðingu þýska símans var það markmið ríkisstjórnarinnar að sem stærstur hluti félagsins kæmist í eigu almennings meðal annars vegna þess að lítið var um að almenningur ætti hluti í fyrirtækjum. Um það hvort hann telji slíkt fyrirkomulag heppilegt hér á landi segir Schuerle að ríkisstjórnin hafi úr ýmsum kostum að velja. Hann segir að líklega sé raunhæfara hér á landi en í Þýskalandi að selja stóran hlut til kjölfestufjárfestis. "Þegar um ræðir Deutsche Telekom er kjölfestuhlutur hundruð milljarða krónafjárfesting en það má ætla að fleiri geti keppst um hlut í Símanum hér á Íslandi," segir hann