Lyfjaverksmiðja reist á Húsavík

Navamedic ehf., dótturfélag Navamedic ASA í Noregi, hyggst í sumar hefja framkvæmdir við fyrri áfanga verksmiðjuhúss á Húsavík þar sem unnið verður hráefni til lyfjagerðar. Undirbúningur hefur staðið í rúm þrjú ár en kostnaður við fyrri áfanga verksmiðjunnar er nálægt 200 milljónum kóna. Fjármögnun er á lokastigi og segir Öyvind S. Brekke, framkvæmdastjóri Navamedic í Noregi, að innan við 10 prósent vanti til að ljúka fjármögnun fyrri áfangans. Í verksmiðjunni, sem rísa mun sunnan við rækjuvinnslu Íshafs, verður í fyrstu unnið kítín úr rækjuskel. Kítínið verður flutt til Noregs þar sem því verður umbreytt í glúkósamín, komið í töfluform og markaðssett sem lyf. Í síðari áfanganum er ætlunin að koma á fót glúkósamínverksmiðju og á hún að verða tilbúin 2008. Á sama tíma verður hætt að flytja kítínið til Noregs en glúkósamínið verður virkt lyfjaefni í duftformi. Duftið verður flutt til Noregs þar sem því verður komið í töfluform en ekki þykir hagkvæmt að fjárfesta í búnaði til töfluvinnslu á Húsavík fyrir aðeins eina afurð. Glúkósamín virkar á bandvefi líkamans og er til dæmis talið geta unnið gegn slitgigt. Navamedic í Noregi hefur selt glúkósamín sem heilsubótarefni og hefur efnið m.a. verið selt sem slíkt í verslunum á Íslandi. Undanfarin tvö ár hefur fyrirtækið unnið að lyfjaþróun með það að markmiði að verða fyrsta fyrirtækið í Evrópu til að koma efninu í lyfjaverslanir. Gangi það eftir mun verðmæti framleiðslunnar stóraukast en Navamedic hefur sótt um lyfjaleyfi í Svíþjóð og er svara að vænta fljótlega. Á Húsavík eru kjöraðstæður frá náttúrunnar hendi til framleiðslu glúkósamíns en framleiðsluferlið kallar á mikið af hreinu köldu vatni og 130 gráðu heita gufu. Hvort tveggja er að finna á Húsavík á samkeppnishæfu verði. Á bilinu 18 til 20 manns munu starfa í lyfjaverksmiðjunni eftir að þar hefst framleiðsla á glúkósamíni.