Reynt að halda viðskiptum FL Group

Forstjóri Skeljungs, sem selur Icelandair eldsneyti, segir að fyrirtækið ætli að reyna að halda viðskiptunum, en flugfélagið ætlar að hefja eigin innflutning. Flugleiðir keyptu á síðasta ári eldsneyti fyrir tæplega sex milljarða króna, þar af um helminginn hér á landi. Stöð 2 greindi frá því í gær að FL Group hefði sótt um rúmlega 30 þúsund fermetra lóð í Helguvík undir eldsneytisbirgðastöð og að fyrirtækið ætlaði að flytja inn allt eldsneyti fyrir sig sjálft í framtíðinni og líklega selja öðrum flugfélögum eldsneyti líka. Flugfélagið er stærsti kaupandi eldsneytis á Íslandi með um fimmtung þess sem flutt er inn. Skeljungur sér félaginu fyrir eldsneyti núna en ekki er langur tími eftir af þeim samningi. Gunnar Karl Guðmundsson, forstjóri Skeljungs, hafði ekki heyrt af þessum hugmyndum viðskiptavinar síns þegar Stöð 2 ræddi við hann í dag. Hann sagði þó að þar á bæ myndu menn reyna að bæta sig til að halda viðskiptunum. Enda er þar eftir miklu að slægjast. Á síðasta ári keyptu Flugleiðir eldsneyti fyrir 5,6 milljarða króna. Þar af er um helmingurinn keyptur hér á landi þannig að á síðasta ári námu þau kaup hátt í þremur milljörðum króna. Full alvara er á bak við þessa áætlun hjá FL Group og verður eldsneytinu þá dælt úr skipi í tanka í Helguvík og þaðan mun síðan liggja leiðsla upp á Keflavíkurflugvöll, beint að væng, eins og það er kallað, það er að segja eldsneytinu verður dælt beint úr leiðslunni úr Helguvík í tanka vélanna en ekki fyrst í tank á flugvallarsvæðinu.