Kærum Kers og Olís vísað frá

Áfrýjunarnefnd samkeppnismála hefur vísað frá kærum Kers og Olís vegna þeirrar ákvörðunar Samkeppnisstofnunar að veita Landssambandi íslenskra útvegsmanna aðgang að upplýsingum tengdum samráði olíufélaganna sem áður höfðu verið felldar úr úrskurði samkeppnisráðs vegna trúnaðar. Fosvarsmenn Kers og Olís bentu m.a. á að Samkeppnisstofnun skorti vald til að taka ákvörðun um hvort verða ætti við beiðni LÍÚ og því hefði landssambandið frekar átt að snúa sér beint til úrskurðarnefndar um upplýsingamál með beiðni sína. Auk þess hefðu samkeppnisyfirvöld sjálf tekið þá ákvörðun að fella út upplýsingar vegna trúnaðar. Áfrýjunarnefndin segir m.a. að beiðni LÍÚ hafi einkum verið byggð á upplýsingalögum og sömuleiðis ákvörðun Samkeppnisstofnunar. Samkvæmt þeim lögum sé heimilt að bera synjun stjórnvalds um að veita aðgang að gögnum samkvæmt lögunum undir sérstaka úrskurðarnefnd um upplýsingamál sem úrskurðar um ágreininginn. Þar sé hins vegar ekki minnst á kæruheimild þess sem kann að eiga andstæða hagsmuni ef stjórnvald heimilar aðgang að upplýsingum. Í því tilviki gildi því almennar reglur um stjórnsýslukærur og stjórnsýslukæra fresti ekki réttaráhrifum upphaflegrar ákvörðunar. Enn fremur segir í úrskurði áfrýjundarnefndar að samkvæmt samkeppnislögum skuli ákvarðanir samkeppnisyfirvalda sæta kærum til áfrýjunarnefndar samkeppnismála. Áfrýjunarnefndin telji ljóst að synjun samkeppnisyfirvalda um aðgang að gögnum samkvæmt upplýsingalögum yrði ekki borin undir nefndina heldur undir úrskurðarnefnd um upplýsingamál. Í því verði einnig talið felast að ákvörðun um að veita aðgang að upplýsingum samkvæmt upplýsingalögum fari eftir þeim lögum og stjórnsýslulögum ef því er að skipta. Þá segir í úrskurðinum að ekki verði séð að samkeppnisleg rök leiði til þess að ólík málsmeðferð skuli gilda um aðgang almennings að upplýsingum í samkeppnismálum fremur en í öðrum málum sem upplýsingalög taki til. Því eigi grein samkeppnislaga um málskot til áfrýjunarnefndar ekki við hér og málinu því vísað frá henni.