Beðið eftir ákvörðun Steinunnar

Enn er þess beðið með eftirvæntingu hvort Steinunn Jónsdóttir, dóttir Jóns Helga Guðmundssonar sem kenndur er við Byko, selji fjögurra prósenta hlut sinn í bankanum og þá hverjum. Hlutur Steinunnar getur orðið til þess að nýr meirihluti myndist í bankanum. Margir bjuggust við að í dag yrði gert ljóst hver myndi kaupa hlut Steinunnar en svo var ekki. Eins og fram hefur komið í fréttum á sér stað hörð valdabarátta innan Íslandsbanka. Bjarni Ármannsson, forstjóri bankans, hefur tekið fullan þátt í þessari baráttu en nýlega keypti Bjarni hlutabréf í bankanum fyrir 1,3 milljarða króna af Jóni Helga Guðmundssyni, eiganda Byko og föður Steinunnar. Deilt er hart um það á markaði hvort það teljist siðferðilega rétt af forstjóranum að blanda sínum eigin persónulegu hagsmunum með þessum hætti í málið því sem forstjóri eigi hann að hafa hagsmuni allra hluthafanna í fyrirrúmi og það geti hann ekki í þessari stöðu. Bjarni sagði þó sjálfur í samtali við fréttastofu Stöðvar 2 að kaupin væru fullkomlega eðlileg. Þá keypti Einar Sveinsson, stjórnarformaður bankans, fyrir ríflega 500 milljónir og aðrir fimm lykilstjórnendur keyptu fyrir um 226 milljónir hver og er talið að með kaupunum vilji þeir tryggja völd sín innan bankans. Ekki náðist í Steinunni fyrir fréttir og hvort af sölunni verður eða hvenær er ekki hægt að segja til um að svo stöddu. Þykir þó flestum líklegast að ef sölunni verður selji hún hlutinn aðila tengdum Straumi.