Þriggja ára í piparkökubakstri

Yfir 720 klukkustundir fóru í piparkökubakstur fyrir Piparkökuhúsaleik Kötlu í Kringlunni. Leikurinn er fastur liður í jólaundirbúningnum. Börnum sem taka þátt fjölgar. Yngsti keppandinn er aðeins 3 ára gamall.

Konungshallir, raðhúsalengjur, einbýlishús og blokkir eru meðal þeirra listaverka sem sett hafa verið saman í Piparkökuhúsaleik Kötlu, sem nú stendur yfir í Kringlunni. Leikurinn, sem hjá mörgum markar upphaf jólanna, hófst í Kringlunni þann 9. desember, þegar tekið var á móti piparkökuhúsum þátttakanda. Alls bárust 40 piparkökuhús. Í ár er 13 árið í röð sem Piparkökuhúsaleikur Kötlu er haldinn við góðar undirtektir.

Einar Viðarsson, forsvarsmaður bakarasviðs Kötlu, viðurkennir fúslega að keppnin sé hörð, enda margir þátttakendur orðnir sjóaðir í gerð piparkökuhúsa: "Sumir keppendur taka þátt ár eftir ár og bera stundum sigur úr bítum og stundum ekki. En til þess að ekki halli á yngstu keppendurna buðum við börnum að skrá sín hús sérstaklega. Yngsti keppandinn í ár er 3 ára piltur sem bakaði sitt hús í félagi við eldri bræður sína. Sá snáði er því einn af 32 keppendum í barnaflokki sem keppa til sigurs." Sex vikna streð

Gríðarlega mikil vinna hefur verið lögð í gerð piparkökuhúsanna, sem nú prýða neðri hæð Kringlunnar. Þeir keppendur sem hafa lagt hvað mesta vinnu í sín hús hafa unnið að þeim sleitulaust í allt að 6 vikur!

"Við reiknuðum þetta saman í huganum og komumst að þeirri niðurstöðu, að líklega hefðu farið um það bil 720 klukkustundir í bakstur allra þeirra listaverka sem send voru í keppnina," segir Einar.

"Í okkar huga er þetta þó fyrst og fremst keppni sem á að sameina fjölskylduna, ekki endilega kapphlaup þar sem verðlaunin skipta höfuðmáli." Það er akkúrat með það í huga sem veitt eru verðlaun fyrir fimm skemmtilegustu húsin í barnaflokki – þar verður fimm bestu húsin öll í fyrsta sæti. Hver vinningshafi mun fá gjafabréf frá Dótabúðinni að verðmæti 20.000.- krónur, auk Playstation 2 tölvu og nýjasta Harry Potter tölvuleikinn.

3000 hjörtu

Líklega fengu einhverjir innblástur fyrir Piparkökuhúsaleikinn þegar útskriftarnemar bakarasviðs Hótels- og matvælaskólans komu í Kringluna í byrjun mánaðarins og skreyttu ríflega 3.000 piparkökuhjörtu með gestum og gangandi. Stemmningin var einstaklega góð og óhætt að segja að smáfólkið hafi fengið jólafiðring í magann við piparkökuátið.

"Þátttakan í Piparkökuhúsaleiknum er alltaf feikilega góð. Við höfum þó sóst eftir því að fólk, sem ekki hefur tekið þátt áður, spreyti sig líka. Með uppákomunni í Kringlunni í byrjun mánaðarins reyndum við að ná til þeirra sem ekki hafa tekið þátt áður," segir Einar og undirstrikar að það eitt að vera með sé aðalatriðið.

"Við gleymum okkur og þeim sem okkur þykir vænt um allt of oft í jólaösinni. Með því að grípa kökukeflið og hræra saman smá glassúr getum við sest niður við eldhúsborðið og dundað okkur við eitthvað skemmtilegt með smáfólkinu okkar. Jólin snúast nú einu sinni um fjölskylduna!" Óætar jólaseríur

Reglurnar í Piparkökuhúsaleiknum eru sáraeinfaldar. Aðalatriðið er að húsið sé ætt, en þó er í lagi að nota "óætar" ljósaseríur til þess að lýsa það upp eða umhverfi þess. Reglurnar koma í veg fyrir að starfsmenn Kötlu geti tekið þátt, en Einar lumar þó á nokkrum góðum ábendingum til þátttakanda varðandi samsetningu og skreytingu:

"Það er gott að hræra örlítið af eggjahvítu og flórsykri. Þessi blanda er bragðgóð en hún harðnar þó ansi fljótt þannig að betra er að hafa snör handbrögð. Blönduna er síðan hægt að setja í sprautupoka og sprauta á þá hluta sem haldast þurfa saman. Þegar búið er að sprauta þarf aðeins að halda við í stutta stund og þá ættu hlutarnir að haldast saman," segir Einar og bendir á að einnig sé hægt að nota þessa blöndu til þess að skreyta húsin.