Þriðju Kristalstónleikarnir

Þriðju kammertónleikarnir í Kristalstónleikaröð félaga úr Sinfóníuhljómsveit Íslands fara fram í Listasafni Íslands síðdegis í dag.

Þar leikur Áshildur Haraldsdóttir flautuleikari ásamt slagverksleikurunum Steef van Oosterhout, Frank Aarnink, Árna Áskelssyni, Jorge Renes López, og Kjartani Guðnasyni undir stjórn Eggerts Pálssonar.

Áshildur útskýrir að efnisskrá tónleikanna samanstandi af draumaverkefnum hljóðfæraleikaranna. Sjálf leikur hún aðeins í einu verkanna, Suite en Concert eftir André Jolivet. „Það er verk fyrir flautu og fjóra slagverksleikara, einkar fjörlegt og öflugt verk,“ segir hún. „Það eru miklar andstæður í því en tónskáldið leitaði aftur til upprunans. Verkið er samið 1965 en á þeim tíma var nútímatónlist mjög ströng og reglubundin en Jolivet var uppreisnarseggur sem fór alltaf eigin leiðir en í þessu verki leitar hann aftur í frummennskuna,“ útskýrir Áshildur.

Slagverksleikararnir leika á fjölda hljóðfæra og Áshildur áréttar að úr því verði mikið sjónarspil. „Þetta eru stuttir tónleikar en ég held að krakkar gætu til dæmis haft mjög gaman að því að sjá og heyra í öllum þessum hljóðfærum.“

Að sögn Áshildar er þetta verk í miklu uppáhaldi hjá þeim öllum en þar sem það sé þungt í vöfum og falli ekki vel inn í hefðbunda efnisskrá hljómsveitarinnar láta þau draum sinn rætast nú og leika það á kammertónleikunum enda sé þar kjörið tækifæri til að leika uppáhalds verkin þeirra.

Á efnisskránni eru einnig slagverksverk eftir Steve Reich og Astor Piazzolla.

Tónleikarnir fara fram í Listasafni Íslands við Fríkirkjuveg og hefjast kl. 17.