Bara tveir eftir í múm

Aðeins tveir meðlimir eru eftir í hljómsveitinni múm, sem hitar upp fyrir Sykurmolana í Laugardalshöll 17. nóvember, eða þeir Örvar Þóreyjarson Smárason og Gunnar Tynes.

Söngkonan Kristín Anna Valtýsdóttir hætti í múm fyrir um það bil ári og hefur dvalið mest í New York síðan þá. "Hana langaði að prófa nýja hluti og skoða heiminn," segir Gunnar, sem hefur einnig komið fram undir nafninu Illi Vill. Áður hafði tvíburasystir hennar Gyða hætt í sveitinni árið 2002.

Múm hefur lokið við gerð nýrrar plötu sem var tekin upp í Finnlandi. Var Kristín ekki með á henni. Gunnar játar að erfitt hafi verið að missa hana úr sveitinni eftir mörg ár í framlínunni. "Það voru mikil viðbrigði en hlutirnir breytast og þróast. Hún var hætt áður en við gerðum þessa nýju plötu. Þetta var náttúrulegt ferli. Við vorum ekkert að láta einhvern herma eftir henni," segir hann.

Tónlistarkonan Sigurlaug Gísladóttir, betur þekkt sem Mr. Silla, söng töluvert á plötunni, auk þess sem þær Hildur Guðnadóttir og Ólöf Arnalds ásamt Eika koma við sögu. Finnskur trommari hefur spilað töluvert með múm að undanförnu og mun hann koma fram á tónleikunum í Höllinni. "Við erum rosaspenntir. Ég hlakka mikið til enda verður þetta í fyrsta skipti sem við spilum saman með nýtt "line-up"," segir Gunnar.

Þetta verða fyrstu tónleikar múm á árinu en sveitin hélt síðast tónleika í Tapei, höfuðborg Taívans, fyrir rúmu ári. Síðast spilaði sveitin hér á landi í ágúst í fyrra á Snæfellsnesi.