Traustar undirstöður og ný skref til sóknar

Vöxtur atvinnulífsins síðustu ár hefur verið ævintýri líkastur. Íslenskt atvinnulíf hefur vaxið og hlutabréfaverð hækkað verulega hér á landi síðustu árin á sama tíma og ákveðin stöðnun hefur átt sér stað á alþjóðamörkuðum. Á árinu 2006 snerist myndin við og hlutabréfaverð stóð í stað hér á landi, á sama tíma og mikillar bjartsýni fór að gæta á alþjóðamörkuðum og hlutabréfaverð tók að hækka á nýjan leik.

Almennt má segja að árið í ár hafi verið ár endurskipulagningar í íslensku atvinnulífi eftir mikinn vöxt undangenginna ára. Undirstöður hafa verið treystar og brugðist hratt og vel við ábendingum erlendis frá um hvað mætti betur fara. Eftir stendur að fjármálakerfið hér á landi stendur mun sterkara en áður og getur tekið ný skref til frekari sóknar á næstu árum.

Eyrir Invest varð stærsti hluthafinn í Marel á árinu og er þetta fyrsta heila starfsárið sem ég veiti fyrirtækinu stjórnarformennsku. Markaðurinn sem Marel vinnur á, við gerð háþróaðra matvælavinnsluvéla, er áhugaverður þar sem hann vex mjög hratt vegna neyslubreytinga og ekki síður vegna þess að ekkert eitt fyrirtæki er afgerandi leiðtogi á markaðnum í dag. Í upphafi árs setti Marel sér metnaðarfull vaxtarmarkmið til næstu ára sem miða að því að ná forystu á þeim markaði sem félagið starfar á og margfalda veltu og hagnað félagsins.

Við sýndum svo í verki á næstu mánuðum að okkur var full alvara og tvöfölduðum umsvifin með yfirtökum á tveimur af okkar helstu keppinautum; AEW Delford í Bretlandi og Scanvaegt í Danmörku. Ef okkur tekst að spila vel úr þeirri stöðu sem við erum nú komin í er framtíðin björt. Þeirri sýn deila fyrrum eigendur Scanvaegt með okkur sem kusu að vera hluthafar í sameinuðu fyrirtæki í stað þess að fá staðgreiðslu fyrir fyrirtæki sitt. Í framhaldi af þessum yfirökum var ráðist í afar vel heppnað hlutabréfaútboð til að skapa grunn að frekari vexti Marels.

Um áramótin rennur Kauphöll Íslands inn í OMX sem er sameiginlegur markaður kauphalla á Norðurlöndum og í Eystrarsaltsríkjunum. Við það eykst sýnileiki og seljanleiki íslenskra hlutabréfa verulega. Jafnframt mun samanburður á rekstri félaganna og virðisaukningu þeirra verða skýrari gagnvart öðrum sambærilegum fyrirtækjum.

Framleiðslufyrirtækin sem skráð eru í Kauphöllinni hafa nú nær öll tekið upp aðra starfrækslumynt en krónur og fyrsti bankinn hefur tilkynnt að hann muni gera það einnig. Meginstarfsemi bankanna er tengdur beint eða óbeint öðrum gjaldmiðlum en íslensku krónunni og því dregur það verulega úr áhættu hvers banka, og fjármálakerfisins í heild, að skipta um mynt. Næstu skref sem verða skoðuð í þessum efnum er að eiga viðskipti með hlutabréf þeirra félaga sem eru í Kauphöllinni í öðrum myntum en krónu.

Atvinnulífið hér á landi er einfaldlega orðið of stórt og fjölþjóðlegt til að geta stuðst við þá örmynt sem íslenska krónan er. Á sama tíma og atvinnulífið tekur ábyrga afstöðu og skiptir um mynt til að minnka áhættu og auka sóknartækifæri er nauðsynlegt að almenn umræða á vettvangi stjórnmálanna fari af stað um framtíðarfyrirkomulag peningamála í landinu.

Að lokum vil ég þakka fyrir árið sem er að líða og óska öllum gleðilegs nýs árs.