Eins og landsmönnum er orðið rækilega ljóst þá setja stjórnmálaflokkarnir skipulagsmálin á oddinn í komandi borgarstjórnarkosningum. Þessi málefni hafa um langa hríð verið Hrafni Gunnlaugssyni kvikmyndagerðarmanni ákaflega hugleikin og síðla árs árið 2000 frumsýndi hann heimildarmyndina "Reykjavík í öðru ljósi" þar sem hann lagði fram, með aðstoð nýjustu tölvutækni, nýjar og einkar forvitnilegar hugmyndir um þróun skipulagsmál í Reykjavík.
Þóttu margar hugmyndanna sem í myndinni komu fram æði róttækar og hreinlega fjarstæðukenndar. En nú sex árum síðar hafa stjórnmálaframboð í höfuðborginni veitt ófáar þeirra upp á yfirborðið, í sömu eða samskonar mynd, í aðdraganda borgarstjórnarkosninganna. Nægir þar að nefna hugmyndir um flutning Árbæjarsafns, en í myndinni leggur Hrafn til að safninu verði fundinn staður í Hljómskálagarðinum. Einnig veltir Hrafn fyrir sér möguleikum sem fyrir hendi eru á flutningi flugvallarins úr Vatnsmýrinni og nefnir þar til sögunnar Skerjafjörðinn sem hugsanlegan flugvallarstað.
Mynd Hrafns skapaði miklar umræður í samfélaginu á sínum tíma og mætti segja að hún hafi átt stóran þátt í að hrinda af stað þeirri miklu skipulagsumræðu sem er nú að ná hámarki fyrir borgarstjórnarkosningarnar.
NFS sýnir þessa umtöluð mynd Hrafns á morgun fimmtudag kl. 21.10 í tilefni af komandi kosningum. Myndin er endursýnd laugardaginn 13. maí kl. 16.10 og sunnudaginn 14. maí kl. 14.10.
