Gæti skitið á sviðið og unnið

"Æfingin var æðisleg. Hvað sem ég geri er æðislegt. Ég gæti skitið á sviðið og samt unnið keppnina," sagði Silvía á ensku við blaðamann Fréttablaðsins rétt áður en einkabifreið hennar flutti hana burt úr O.A.K.A höllinni í Aþenu fyrr í dag, þar sem Eurovision fer fram: "Þau elska mig."

Æfingin gekk ekki sem best, en Silvía Nótt steig á Rómaríó, rann til á sviðinu, púað var á hana af Grikkjum í höllinni og hún missti söngtaktinn þegar hún renndi sér niður rennibrautina, sem er hluti af sviðsmyndinni.

Spurð af hverju gekk svona illa, þegar hún yfirgaf höllina stuttu eftir atriðið, svaraði hún á íslensku: "Bíddu, er ekki allt í lagi." Það eru fyrstu íslensku orð hennar í langan tíma.

Silvía svaraði ekki þegar hún var spurð hvort hún væri ennþá veik, en Rómaríó sagði að hún hefði hita. Hún gæti því ekki tjáð sig við fjölmiðla.

"Fariði, ég á mitt einkalíf," hrópaði Silvía á meðan hún, Rómaríó og Peppe leituðu að bílnum sem flutti þau upp á hótel. Silvía ákvað síðan að gefa álit sitt á æfingunni eins og sjá má.

Silvía stígur aftur á svið í kvöld. Genaralprufan verður á morgun og svo stóra stundin annað kvöld. Af frammistöðunni má helst dæma að leikkonan Ágústa Eva Erlendsdóttir hafi ekki náð sér frá því í gær. Hún hefur átt betri daga.

Fjölmargir fylgdust með Silvíu á skjám úr fjölmiðlaherbergi hallarinnar. Menn brostu út í annað og hvöttu hana áfram. Hún hefur ekki misst athyglina eða hörðustu aðdáendurna hér í Aþenu, þrátt fyrir skilningsleysi Grikkjanna á persónu hennar.

Spennan magnast í höllinni í Aþenu. Hingað til fumlaus atriði keppinauta Silvíu fengu á sig hnökra á æfingunni. Rússinn Dima Bilan, sem spáð er góðu gengi, fór í fyrsta sinn út af lagi. Söngkonan Sandra Oxenryd, sú sænska sem keppir fyrir Eistland, átti slæman dag og var einnig fölsk. Ofurstjarnan sænska Carola hefur oft verið betri. Aðeins Hari Mata Hari frá Bosníu, sem syngur á undan Silvíu, gerði enn betur en hingað til.