Hádegistónleikar í Hallgrímskirkju

Lenka Mátéová, organisti Fella- og Hólakirkju, leikur á hádegistónleikum Alþjóðlegs orgelsumars í Hallgrímskirkju fimmtudaginn 13. júlí kl. 12. Lenka stundaði tónlistarnám sitt í Tékklandi, þar sem hún ólst upp en hún hefur starfað hér á Íslandi síðan 1990.

Á efnisskrá Lenku eru fjögur verk. Fyrst eru Orgelsónata nr. 2 í c-moll eftir Felix Mendelssohn og sálmforleikurinn O Mensch, bewein’ dein’ Sünde gross eftir Johann Sebastian Bach. Frá heimalandi sínu leikur hún Vigilia eftir Bohuslav Matinu og tónleikunum lýkur með Introduction og passacagliu í d-moll eftir Max Reger.

Lenka Mátéová er fædd í Tékkóslóvakíu. Hún lauk kantorsprófi við Tónlistarháskólann í Kromeríz og mastersnámi við Tónlistarakademíuna í Prag. Á námsárunum vann hún til margra verðlauna í heimalandi sínu. Lenka hefur starfað á Íslandi frá 1990 og er nú kantor við Fella- og Hólakirkju.

Lenka hefur haldið fjölda einleikstónleika hér á landi og víða um Evrópu og leikið einleik með Sinfóníuhljómsveit áhugamanna. Að undanförnu hefur hún verið í samstarfi við marga kóra, t.d. Drengjakór Reykjavíkur, Hljómeyki, Karlakór Reykjavíkur og tekið þátt í frumflutningum tónverka eftir íslenskra höfunda sem hafa verið hljóðritaðir fyrir útvarpið og á geislaplötur.