Kanadísk menningarhátið

Kanadískar kvikmyndir og bókmenntir verða í brennidepli í Bókasafni Kópavogs á Kanadískri menningarhátíð, sem verður haldin dagana 14.-22. október nk. Kvikmyndahátíðin hefst nk. laugardag, 14. október, kl. 15:30 með sýningu á heimildarmyndinni Unakuluk (Dear little one) í Kórnum, sýningarsal bókasafnsins á fyrstu hæð. Aðgangur er ókeypis á allar sýningar kvikmyndahátíðarinnar.

Sunnudaginn 15. okt. kl. 14:00 verður hin margverðlaunaða mynd Atanarjuat (The fast runner) eftir Zacharias Kunuk (2005). Myndin gerist á hinum harðbýlu heimskautasvæðum Kanada þar sem inúítarnir sem þar hafast við eiga í stöðugri baráttu við hin óblíðu náttúruöfl og hver og einn þarf að leggja sig allan fram til að ættin megi halda lífi. Myndin verður endursýnd laugardaginn 21. okt. kl. 14:00.

Mánudaginn 16. okt. kl. 18:00 verður sýnd gamanmyndin Rare Birds frá árinu 2001 í leikstjórn Sturlu Gunnarssonar. Myndin er í anda Saving Grace og segir frá því þegar tveir vinir reyna að bjarga fjárhag sínum með því að gefa í skyn að fágætur fugl hafi sést í nágrenninu, fuglaáhugamönnum til mikillar gleði. Myndin verður einnig sýnd miðvikudag 18. okt. kl. 18:00.

Þriðjudaginn 17. okt kl. 15:30 verður Unakuluk sýnd öðru sinni. Myndin er framleidd af Women's Video Workshop árið 2005. Ættleiðing barna innan fjölskyldu inúíta hefur tíðkast í aldaraðir. Í myndinni er talað við einstaklinga um reynslu þeirra af ættleiðingu og þennan þátt í menningu þeirra. Myndin verður síðan sýnd í þriðja og síðasta sinn fimmtudaginn 19. okt. kl. 19:00.

Rithöfundurinn Michael Ondaatje, höfundur The English Patient, skipar heiðursess Kanadískrar menningarhátíðar í Bókasafni Kópavogs og verður bókum hans stillt sérstaklega upp. Laugardaginn 21. október kl. 13:00 sýna Helga Arnalds og Brúðuleikhúsið 10 fingur gamanleikritið Leifur heppni og fundur Ameríku í Lindasafni, Núpalind 7.