Ætlar ekki að gefast upp

Tónlistarmaðurinn og annar af meirihlutaeigendum húsnæðis Tónlistarþróunarmiðstöðvarinnar, Danny Pollock, játar að allt líti út fyrir að efnaðir menn ætli sér að kaupa húsnæðið, eins og kom fram í Fréttablaðinu í gær.

„Við eigum ekki annarra kosta völ en að taka tilboðinu með þeim fyrirvara að það náist samstarfssamningur við Reykjavíkurborg um rekstur Tónlistarþróunarmiðstöðvarinnar,“ segir Danny. „TÞM er í sinni skuldasúpu og við erum að vinna með borginni í þessum málum. Það tekur sinn tíma að vinna í svona málum með sveitarfélögum og ríkinu en tíminn er bara á þrotum. Eins og staðan er í dag verðum við að selja ef við náum samningi við borgina.“

Danny á meirihluta húsnæðisins ásamt Jóni Sævari Þorbergssyni. Hann segist ekki fá mikinn pening í vasann verði af sölunni, en tilboðið frá Lindberg hf. hljóðar upp á 170 milljónir. „Nei, nei, það eru einhverjir smáaurar eftir þegar maður er búinn að borga skuldirnar. Húsið er dýrt og það hafa farið margar milljónir í að endurfjármagna það. Við það hefur skuldabyrðin aukist.

En maður losnar undan þessari persónulegu ábyrgð. Einstaklingur á ekki að eiga svona tómstundarhúsnæði,“ segir hann.

Danny segir að fjöldi hljómsveita sem æfa í TÞM muni fara á götuna náist ekki samningar við borgina og bætir því við að í raun sé þörf fyrir tvöfalt stærra húsnæði til að anna eftirspurninni. Hann segist ekki ætla að leggja árar í bát þótt samningarnir náist ekki. „Þetta er grundvallaratriði fyrir tónlistarmenninguna. Ég er ekki maður sem gefst upp. Baráttan heldur bara áfram.“

Þess má geta að baráttutónleikar til stuðnings Tónlistarþróunarmiðstöðinni verða haldnir á morgun þar sem fjöldi hljómsveita mun koma fram.