Nýjar fréttir af 12 tónabræðrum

Lárus í 12 tónum er bara heldur ánægður með lífið þessa dagana. Nýorðinn faðir að sínu þriðja barni og fyrirtæki þeirra félaganna dafnar vel: „Við eru í skýjunum yfir árangri okkar fólks á Íslensku tónlistarverðlaununum í síðustu viku.

Þar áttum við fimm af sex bestu diskunum.“ Lárus segir 12 tóna vera í nokkrum breytingarfasa en búðir fyrirtækisins í Kaupmannahöfn og á Skólavörðuholtinu gangi báðar vel: „Við erum að færa til mannskap, við höfum verið hér níu til tíu menn en verðum núna fimm hér heima og fimm úti.“

12 tónar er útrásarfyrirtæki. Það er ekki bara að þeir reki verslun erlendis, heldur hafa þeir félagar Lárus og Jóhannes verið að vinna að stórum dreifingarsamningi við þýska aðila. „Það er eitt af stærstu sjálfstæðu dreifingarfyrirtækjunum í Þýskalandi og þessir samningar eru að komast í höfn. Samningurinn tryggir okkur og okkar fólki aðgang að öllum löndum Evrópu.

Þetta er gríðarlega stórt verkefni fyrir okkur og útheimtir mikla vinnu þegar samningurinn er undirritaður. Við verðum að kynna listamenn okkar í mörgum löndum og munum halda sýningu – showcase – hér heima í vor þar sem við fljúgum hingað heim fjölda blaðamanna víðs vegar að úr Evrópu.“

Fyrirtækið er sem sagt að stækka: í katalóki 12 tóna eru nú yfir fimmtíu titlar. Lárus segir mikilvægt að bæta þjónustuna í búðinni og tryggja gott úrval. Skólavörðustígurinn tekur líka oft á sig býsna heimilislegan svip þegar gestir setjast í gamla sófasettið undir myndum af forsetum lýðveldisins og hlusta á tónlist úr öllum hornum heimsins.

Útgáfan er að skríða af stað eftir hátíðirnar: Ólöf Arnalds sendir frá sér langþráðan disk í þessum mánuði sem Kjartan í Sigur Rós pródúseraði; Steindór og Hilmar Örn eru að klára rímnadisk með strengjasveit úr Sinfóníunni, Johnny Sexual er að klára dansplötu. Og katalókurinn er lifandi: það er víða áhugi á diskum Brynhildar Guðjónsdóttur og stefnt á útgáfu á þeim báðum í Suður-Kóreu.

Áhuga finna þeir líka víða í Evrópu. Þórir gefur út sína þriðju plötu á merki 12 tóna og undirbúningur er langt kominn fyrir fyrstu sólóplötu Víkings Heiðars sem verður tekin upp í Þýskalandi: „Það er búið að velja hljóðfærið og svona,“ segir Lárus. Það er ekki kastað til höndunum. Við munum gefa út tónlistina úr Legi eftir Hugleik. Hún er eftir Flís-drengina og kemur út um svipað leyti og frumsýningin verður. Svo erum við með nokkra unga listamenn sem eiga eftir að koma verulega á óvart.“

Og indípoppið sem hefur vaxið hjá fyrirtækinu:

„Jakobínarína er að klára plötu í Wales þar sem Oasis hafa áður unnið. Þeir hafa farið víða um Bretland og spilað fullt. Diskurinn þeirra átti að koma út á Rough Trade en að öllum líkindum kemur hann á einum af stóru majoronum.“ Það er nóg að gera. Lárus ýtir gleraugunum upp á nefið og horfir út: „Það er svo margt í katalóknum okkar sem þarf að vinna meira í að koma á framfæri víðar. það er bara vinna.“ - pbb