Músíktilraunir fara vel af stað

Músíktilraunir hófust í 25. skiptið síðastliðið mánudagskvöld í Loftkastalanum. Alls taka 48 hljómsveitir þátt í keppninni í ár en í kvöld fer fram fjórða undanúrslitakvöldið og hið seinasta fer síðan fram annað kvöld.

Nú þegar eru komnar áfram hljómsveitirnar Magnyl, Loobyloo, Spooky Jetson og The Portals. Tvær bættust svo við hópinn í gær. Allar ágætlega frambærilegar sveitir en engin afgerandi þó.

Líkt og á Músíktilraunum síðasta árs verður sett upp ljósmyndasýning í anddyri Loftkastalans. Þar eru hengdar upp myndir af hljómsveitum sem taka þátt daginn eftir að þær koma fram og geta áhugasamir keypt myndirnar, sem teknar eru af Billa. Í anddyrinu fer einnig fram sýning á ljósmyndum Bjargar Sveinsdóttur sem hefur tekið myndir á keppninni í tuttugu ár.

Sjálft úrslitakvöldið verður svo loks haldið í Listasafni Reykjavíkur, Hafnarhúsinu, laugardaginn 31. mars, klukkan 17.00. Verðlaun verða veitt í ýmsum flokkum en sérstaka athygli vekja verðlaun fyrir bestu textagerðina á íslensku, sem er nýbreytni.