Samstarf hafið við MIT

Íslenskum fyrirtækjum býðst nú að sækja þekkingu í fræðasamfélag MIT-háskólans í gegnum samstarfssamning sem Háskólinn í Reykjavík hefur umsjón með í samstarfi við Samtök iðnaðarins og Viðskiptaráð.

Samstarfinu verður hleypt formlega af stokkunum með ráðstefnu í Háskólanum í Reykjavík eftir helgi. Með samstarfinu er sagt að opnist aðgangur fyrir íslensk fyrir­tæki að víðtæku samstarfi, auk þess sem aðgengilegar verði upplýsingar um nýjungar, rannsóknir og verkefni sem verið sé að vinna að. „Fulltrúar fyrirtækja sem ganga inn í samstarfið við HR fá einnig aðgang að sérfræðingum og geta sótt ráðstefnur, málþing og aðra viðburði sem skipulagðir eru innan ramma samstarfsins,“ segir í tilkynningu HR.

Samstarfið fer fram á vettvangi svokallaðs ILP samstarfs innan MIT en Stjórnendaskóli HR er tengiliður samstarfsins hér.