Fönkskotin tónlist

Platan Fnykur með Stórsveit Samúels Jóns Samúelssonar kemur út á föstudag á vegum SJS Musik. Sama dag heldur Stórsveitin útgáfutónleika á tónlistarhátíðinni Vorblóti.

Tónlistin er öll eftir Samúel, sem hlaut starfslaun listamanna til að semja tónlistardagskrá fyrir Stórsveit. „Þetta er fönkskotin big-band músík,“ segir Samúel um plötuna. Hann segir það hafa verið virkilega gaman að vinna hana. „Þetta heppnaðist vel og ég er rosalega ánægður með útkomuna, enda var æðislegur hópur með mér í þessu.“