Eigið fé bankanna aldrei hærra en nú

Nettóstaða viðskiptabankanna í erlendum gjaldeyri jókst um rúmlega 80 milljarða krónur í desember og var 188,5 milljarðar króna í lok síðasta árs. Það jafngildir tæplega 23 prósentum af eigin fé bankanna og hefur hlutfallið aldrei verið hærra.

Í Morgunkorni greiningardeildar Glitnis í morgun segir að stór aukningarinnar eða ríflega 50 milljarða króna, virðist hafa átt sér stað á örfáum dögum á fyrstu vikum desember og kunni að tengjast hlutafjárútboði Kaupþings erlendis sem lauk undir lok nóvember. Í öllu falli er ólíklegt að þessari upphæð hafi fylgt samsvarandi gjaldeyrisviðskipti á markaði því líklegt er að krónan hefði gefið nokkuð eftir ef sú væri raunin, að sögn greiningardeildarinnar.

Þá bendir deildin á að samkvæmt reglum Seðlabanka megi nettóstaða hvers banka ekki fara yfir 30 prósent af eigin fé nema tilgangurinn sé að verja eiginfjárhlutfall hans. Líklegt sé að slík undanþága hafi verið veitt einhverjum bankanna þriggja og megi telja líklegast að það sé Kaupþing.

Þá segir Glitnir að miklar bollaleggingar hafi verið undanfarið um hvort fleiri fjármálastofnanir hyggist feta í fótspor Straums-Burðaráss og færa eigið fé sitt yfir í evrur. Breytingin er liður banka í að nálgast erlenda fjárfesta og hjálpa til við að ná markmiðum um vöxt erlendis. Raunin er sú að vöxtur viðskiptabankanna mun á næstunni fyrst og fremst eiga sér stað utan landsteinanna og því vegur krónan æ minna í efnahag og rekstri þeirra þeirra, að sögn greiningardeildar Glitnis.