Fönkið endurvakið

Hljómsveitin Ermar - Featuring Horny Horns mun spila fönktónlist á Glaumbar í kvöld. Tónleikarnir eru hluti af tónleikaröðinni Bít Box sem verður á Glaumbar alla fimmtudaga í sumar. Bít Box er samstarf Samma í Jagúar og Steinars sem rekur Glaumbar og vildu þeir með framtakinu skapa vettvang fyrir rytmíska tónlist hér í Reykjavík og hefur Tómas R. Einarsson meðal annars spilað á slíku kvöldi.

Drengirnir í Ermar - Featuring Horny Horns hafa komið víða og meðal annars spilað með Stórsveit Samma og stúlknasveitinni Amiinu og spiluðu reglulega á gamla Kaffi List fyrir nokkrum árum síðan og hyggjast endurvekja þá stemningu sem þar myndaðist. „Nokkrir hljómsveitarmeðlimanna hafa verið búsettir erlendis síðustu ár en við erum allir á landinu í sumar og ákváðum að nýta tækifærið og spila saman. Við munum spila þekkta slagara eftir gamla meistara en spinnum samt sem áður mikið í kringum hvert lag," segir Jóhannes Þorleiksson trompetleikari um fyrirhugaða tónleika. Tónleikarnir hefjast klukkan 22.00 og er aðgangur ókeypis.

- sm