Telja rottur með gervihnöttum

Kaliforníuríki verður fyrsta ríki heimsins til að fylgjast með tegundum í útrýmingarhættu utan úr geimnum.

Það er hin stórvaxna kengúrurotta sem bandarískir vísindamenn ætla að fylgjast með og hafa tölu á með gervihnöttum sem ísraelski herinn notar í allt öðrum tilgangi. Gangi þessi áætlun að óskum verður það í fyrsta skipti sem takast mun með nokkru móti að henda reiður á fjölda og staðsetningu þessarar stórvöxnu rottutegundar sem heldur sig í stórum hópum á Carrizo-sléttunni, suðaustur af Fresno í Kaliforníu.

Fram að þessu hefur verið notast við flugvélar til að kasta tölu á dýrin en sú aðferð þykir ónákvæm og gamaldags. Kengúrurottan fer aðeins á stjá um nætur og lifir á ýmsum plöntutegundum sem San Joaquin-antílópan notar til að skýla sér fyrir sól. Hún er í útrýmingarhættu eins og kengúrurottan sem falklandseyjarefurinn étur annað slagið en hann er að sjálfsögðu einnig í stórhættu. Vísindamennirnir þurfa því að hafa eftirlit með þessu öllu saman og gæta þess að engin tegund verði of atkvæðamikil á kostnað annarrar.