Loðfeldir svínvirka

„Loðfeldir eru flíkur sem svínvirka," segir Klara Stephensen, forstöðukona Listasetursins á Eiðum í Fljótdalshéraði og viðskiptavinur Eggerts feldskera og vinkona til margra ára. „Fyrsta flíkin sem ég eignaðist sem Eggert gerði var brúnn rússneskur lambapels. Straumar og stefnur í tískunni breytast eins og gengur og eitt árið var flíkin orðin of lítill. Þá kom útsjónarsemi Eggerts til sögunnar. Hann tók sig til og varð sér úti um sams konar svört skinn og bætti þeim við flíkina. Eftir endurbætur var flíkin mín sem ný og hana nota ég enn," segir Klara stolt.

„Minkurinn stendur alltaf fyrir sínu," segir Eggert Jóhannsson sjálfur, sem sækir skinnamarkaði í útlöndum árlega. Margir skilgreina flíkur úr dýrum loðskinnum sem stöðutákn. Eggert segir að slík viðhorf séu á undanhaldi. „Loðfeldur er eins og hver önnur fjárfesting sem neytendur kaupa til að njóta. Krafan um vellíðan skiptir öllu, en ekki viðhorf annarra. Neytendur eru sjálfstæðari og djarfari í hugsun en áður," segir hann.

Þegar þrengingar verða á fjármálamörkuðum er stundum eins og þörfin fyrir áþreifanleg verðmæti verði meiri. Hlutabréfaverð lækkar og hrávöruverð hækkar. Flestir tengja flíkur úr loðskinnum við mikil fjárútlát. „Líkt og með aðrar fjárfestingar er farsælt að horfa til lengra tíma en til fáeinna ára," segir feldskerinn. „Í mínum huga eru skinn afurðir eins og hverjar aðrar náttúruafurðir sem ber að nýta. Við höfum ekki efni á öðru. Eitt viðhorfið til náttúruverndar er að ein besta náttúruverndin felist í að maðurinn hugsi um sig sem hluta af náttúrunni. Enda hafa flíkur úr loðskinnum verið hluti af mannkynssögunni frá örófi alda," segir Eggert.

„Loðfeldur er flík sem þú átt að njóta að nota við öll þau tækifæri sem henta þér hverju sinni," segir Klara. „Flíkurnar eiga að fá að slitna og það má sjá á þeim, enda eru flíkur úr loðskinnum ekkert annað en nytjahlutir sem eiga að þjóna eiganda sínum, líkt og fallegt listaverk sem hangir upp á vegg til ánægju og gleði," bendir hún á.

Flestir velja sér minkaskinn í brúnum eða dökkum tónum," segir Eggert og bætir við að Klara sé reyndar mest heilluð af gráum mink, en það skemmtilegasta sem Eggert veit er að sérhanna flík frá grunni fyrir viðskiptavin. „Það tekur að vísu sinn tíma og pælingar en er vel þess virði," segir hann og nefnir að viðskiptavinurinn eignast þá algjörlega sérhannaða flík sem sé engri annarri lík.

Eggert er einn af hundrað feldskerum í heiminum sem hlotið hafa þá viðurkenningu að mega vinna með loðskinn í hæsta gæðaflokki. Flík sem er merkt The Purple Club, eða Fjólubláa klúbbnum, segir neytandanum það að flíkin er gerð úr loðskinni í sérflokki.