Cameron mætti með Shrek-strákana á frumsýningu

Stórmyndin Shrek Forever After var aðalfrumsýning Tribeca-kvikmyndahátíðarinnar, sem hófst fyrir helgi í New York. Cameron Diaz var þar mætt fremst í flokki að kynna myndina en með henni voru þeir Mike Myers, Eddie Murphy og Antonio Banderas.

Robert DeNiro var að sjálfsögðu á svæðinu en hann stofnaði kvikmyndahátíðina til að auka veg Tribeca-hverfisins í New York eftir árásirnar 11. september.

Þrátt fyrir að leikararnir væru allir glimrandi hressir á frumsýningunni dugði það ekki til. Nokkrum gagnrýnendum var boðið á sýninguna og benda fyrstu dómar til þess að myndin sé ekki upp á marga fiska.