Hafnaði Lars Von Trier

Berglind Rósa Magnúsdóttir hefur hannað falleg barnaföt undir nafninu Beroma frá því í byrjun þessa árs. Vörurnar hafa slegið í gegn enda skemmtilegar og einstakar.

Berglind Rósa lærði fatahönnun við Margrethe-hönnunarskólann í Kaupmannahöfn og útskrifaðist þaðan árið 2003. Eftir útskrift ákvað hún að taka sér hlé frá fatahönnuninni og flakka þess í stað um heiminn.

„Ég fékk svo sem nóg af fínum tilboðum eftir útskrift en ég var orðin þreytt á náminu og ákvað í staðinn að flytja til Spánar og Frakklands og vinna á lúxushótelum," útskýrir Berglind en henni bauðst meðal annars vinna við að hanna búninga fyrir leikstjórann Lars Von Trier.

Berglind Rósa segir það hafa verið tilviljun að hún hafi nú lifibrauð sitt af því að hanna barnaföt. Upphaflega hafi hún aðeins ætlað að sauma nokkrar flíkur á syni sína en það hafi fljótlega undið upp á sig.

„Þetta spurðist bara út og nú hef ég varla undan við að sauma. En mér finnst þetta ofboðslega skemmtilegt og nú er þetta orðin mín vinna og mig langar að halda þessu áfram eins lengi og ég get," segir hún.

Efnin sem Berglind Rósa notar hefur hún sankað að sér í gegnum árin og mikið fær hún að gjöf frá ömmum sínum og frænkum. „Með því að panta ekki efni frá heildsölum tryggi ég það frekar að hver flík sé einstök og mér finnst það svolítið skemmtilegt," útskýrir Berglind Rósa, sem er að vonum ánægð með þessar góðu viðtökur sem Beroma hefur fengið.

Fötin eru fáanleg í versluninni Fiðrildinu í Reykjavík, Hrími á Akureyri, Húsi handanna á Egilsstöðum, í Svíþjóð og bráðlega verða þau einnig fáanleg í Bandaríkjunum. Berglind Rósa var einnig þátttakandi í Pop Up markaðinum sem í Hugmyndahúsi háskólanna um helgina. - sm