Gerðu vefsíðu fyrir Winslet

Vefsíðufyrirtækið Davíð & Golíat skaut mörgum bandarískum vefsíðugerðar­fyrirtækjum ref fyrir rass þegar þurfti að smíða vefsíðu fyrir góðgerðarsamtökin The Golden Hat Found­ation.

Eins og Fréttablaðið greindi frá fyrir skömmu hefur Óskarsverðlaunaleikkonan Kate Winslet, í samstarfi við Margréti Dagmar Ericsdóttur, sett á fót góðgerðarstofnunina The Golden Hat Found­ation.

Winslet talaði inn á ensku útgáfuna af Sólskinsdrengnum eftir Friðrik Þór Friðriksson og hreifst mjög af óþrjótandi baráttu Margrétar og Kela, einhverfa stráksins hennar. Þegar búið var að ákveða að stofna góðgerðarstofnunina þurfti að gera vefsíðu og eftir nokkra leit og tilboð hrepptu íslensku fyrirtækin Davíð og Golíat og Hvíta húsið hnossið.

„Þetta var allt unnið með henni og hennar hægri hönd og þá sérstaklega í sambandi við hönnunina. Við erum náttúrulega enn að vinna í vefnum en þetta er að miklu leyti byggt á hugmyndum hennar og aðstoðarfólksins,“ segir Yngvi Tómasson hjá Davíð & Golíat. Það er Vala Þóra Sigurðardóttir hjá Hvíta húsinu sem á heiðurinn af hönnun vefsins en Davíð & Golíat sáu síðan um tæknilegar útfærslur og smíði hans auk þes sem fyrirtækið hýsir vefinn.

„Við vorum í mjög nánu sambandi við Winslet og Margréti líka. Nei, það kom mér ekkert á óvart að Winslet skyldi hafa svona sterkar skoðanir á öllu. Það eru gerðar miklar kröfur um að allt frá henni sé í hæsta gæðaflokki,“ útskýrir Yngvi og bætir því við að Winslet hafi verið feykilega sátt með vefsíðuna og hönnun Völu.

Undirbúningurinn fyrir vefsíðugerðina sjálfa tók heilan mánuð en ferlið í kringum þetta var mikið lengra.

„Við unnum með Margréti að gerð vefsíðunnar fyrir Sólskinsdrenginn. Við vissum því að þetta stæði mögulega til og það var Margrét sem gaf okkur möguleika á því að gera tilboð í verkefnið. Þetta er góður gluggi fyrir okkur því það er mikil umferð um vefinn, sérstaklega frá Bandaríkjunum, og gefur okkur og Hvíta húsinu tækifæri til að sækja á ný mið.“

freyrgigja@frettabladid.is