Hætt við Zoolander 2 og Anchorman 2

„Ron Burgundy og Derek Zoolander vildu báðir koma fram í framhaldsmyndum. En þeir eiga engan aur og eru ekki nógu gáfaðir til að fjármagna myndirnar," skrifaði leikarinn Ben Stiller á Twitter-síðu sína um helgina.

Margir telja þessi skilaboð leikarans gera endanlega út um vonir aðdáenda myndanna Zoolander og Anchorman um framhald. Síðustu vikur hafa aðstandendur þeirra lýst því yfir hvað eftir annað að þá langi til að endurtaka leikinn. Leikarar hafa lækkað launakröfur og pakkinn útbúinn eins ódýrt og mögulegt er. Paramount-kvikmyndaverið neitaði þeim báðum samt sem áður.

Ekki er þó öll von úti enn. Will Ferrell, sem lék Ron Burgundy í Anchorman, segir í viðtali í dag að boltinn gangi enn á milli og að hann haldi í vonina.