Skrásetur lífsgleði á filmu

Ljósmyndarinn og grafíski hönnuðurinn Jóhannes Kjartansson gefur út ljósmyndabók. Í bókinni er að finna 500 myndir en Jói, eins og hann er kallaður, hefur verið að skrásetja lífið á filmu síðan árið 2005. Bókin ber nafnið Joi de vivre; orðaleikur úr franska orðtakinu Joie de vivre eða Lífsgleði á íslensku.

„Með útgáfu bókarinnar er ég að sameina starf mitt sem grafískur hönnuður og ljósmyndaáhugamál mitt,“ segir Jóhannes Kjartansson eða Jói eins og hann oftast er kallaður. Flestir hafa séð Jóa bregða fyrir niður í bæ með myndavélina í buxnastrengnum. Jói hefur það mottó sem ljósmyndari að best sé að taka myndir af fólki þegar það væntir þess minnst og sú speki endurspeglast í myndum hans.

Hann stendur sjálfur að útgáfu bókarinnar Joi de vivre sem kemur út á laugardaginn en hún inniheldur 500 ljósmyndir, átta myndir frá hverjum mánuði síðan 2005. „Árið 2005 byrjaði ég að taka svona „snapshot“ myndir af fólki og öðru sem vakti athygli mína,“ segir Jói en hann telur bókina vera ágætis heimild um landið og samfélagið enda hefur það tekið miklum stakkaskiptum á síðustu árum.

„Borgarlandslag heillar mig meira en landslagsmyndir og á lúmskan hátt held ég að myndirnar í bókinni lýsi góðærinu, kreppunni og svo þessu „post“ krepputímabili sem við erum á núna ágætlega,“ segir Jói en hann tekur allar sínar myndir á filmu. Jói gefur út bókina sjálfur og hefur bara fá eintök til að byrja með. „Ég ætla bara að sjá hvernig þetta gengur og svo kannski hafa samband við einhver bókaforlög ef vel gengur.“

Útgáfufögnuður og ljósmyndasýning verður haldin í húsakynnum verslunarinnar KronKron á Laugavegi 63b á laugardaginn klukkan 16.00. alfrun@frettabladid.is