Una hannar eigin fatalínu

Fatahönnuðurinn Una Hlín Kristjánsdóttir hefur hannað sína fyrstu fatalínu undir heitinu Royal Extreme. Hún segir að fólk verði að láta drauma sína rætast þrátt fyrir kreppu og peningaleysi.

Una Hlín Kristjánsdóttir, fatahönnuður, hefur hannað sína fyrstu fatalínu sem ber heitið Royal Extreme og eru einkunarorð Unu Hlínar „More is more, less is a bore“, sem þýða mætti sem „Meira er meira, minna er leiðigjarnt“.

Una Hlín útskrifaðist frá handmenntarbraut Fjölbrautaskólans í Breiðholti á sínum tíma og þaðan lá leiðin í almenna hönnun í Iðnskólanum og loks í Listaháskólann þar sem hún nam fatahönnun. Undanfarin tvö ár hefur hún starfað sem framleiðslustjóri hjá hönnunarfyrirtækinu Andersen & Lauth en hefur sagt upp starfi sínu þar til að elta drauma sína.

„Ég hef lært ótrúlega mikið af því starfa hjá Andersen & Lauth og sú reynsla sem ég tek með mér þaðan er alveg ómetanleg, enda getur þetta framleiðslukerfi verið afskaplega flókið. Ástæðan fyrir því að ég ákvað að gera mína eigin línu núna var sú að ég hafði þörf fyrir að skapa meira. Í fyrstu ætlaði ég aðeins að byrja á lítilli fylgihlutalínu en ákvað svo að fara með þetta alla leið og gera eina heilsteypta fatalínu og setja hana í framleiðslu. Ég ákvað að elta drauminn um að verða sjálfstætt starfandi hönnuður,“ útskýrir Una Hlín. Línan inniheldur tuttugu og fimm hluti, allt frá sokkum og sokkabuxum til kjóla, jakka og tösku. Vörurnar eru framleiddar á Indlandi og eru flíkurnar allar handunnar enda mikið um skemmtileg smáatriði í hönnun Unu Hlínar.

Aðspurð segist hún hafa fundið fyrir miklum áhuga manna á Royal Extreme og sé það mikil hvatning. „Þótt það séu erfiðir tímar núna og lítið um peninga þá verður maður bara að leyfa sér að gera svona hluti. Ég hef mikla trú á þessu verkefni og ég veit að þetta á eftir að ganga vel, en auðvitað hef ég stundum fengið í magann af áhyggjum. Þessa dagana er ég svo að vinna í því að fá fjárfesta með mér í verkefnið svo ég þurfi ekki að gera þetta algjörlega ein.“ Una Hlín er einn þeirra hönnuða sem taka munu þátt í tískuhátíðinni Reykjavík Fashion Festival nú í mars.

Þeir sem hafa áhuga á að kynna sér hönnun Unu Hlínar er bent á vefsíðuna www.beroyalextreme.com. sara@frettabladid.is