Gísli Örn bjargar frumsýningu Brims

Gísli Örn Garðarsson og Víkingur Kristjánsson ætla að fljúga frá London til Reykjavíkur og bjarga þannig frumsýningu íslensku kvikmyndarinnar Brims eftir Árna Ólaf Ásgeirsson en hún verður lokamynd alþjóðlegu kvikmyndahátíðarinnar í Reykjavík á laugardagskvöld.

Lengi vel var allt útlit fyrir að það yrðu ansi fáir leikarar á frumsýningunni. Stærstur hluti leikhópsins Vesturports frumsýnir Faust í Young Vic-leikhkúsinu í London í kvöld og svo eru þeir Ingvar E. Sigurðsson og Ólafur Egill Egilsson að leika í Íslandsklukku Þjóðleikhússins á sjálfu frumsýningarkvöldinu en þeir leika báðir stór hlutverk í myndinni.

Gísli er auðvitað „bara“ leikstjóri Faust og hans verður því ekki saknað af sviðinu í Young Vic. Víkingur hefur aftur á móti verið skrifaður út úr verkinu vegna anna á heimavígsstöðvunum; konan hans, Halldóra Rut Bjarnadóttir, er komin í leiklistarnám við Listaháskóla Íslands en þau eignuðust barn fyrir þremur mánuðum.

„Hans hlutverki var bara dreift á aðra leikara,“ segir Gísli Örn í samtali við Fréttablaðið. Tvö og hálft ár er liðið frá því að tökur á Brimi hófust en kvikmyndin er byggð á samnefndu verki Jóns Atla Jónassonar.

„Ég held að ég hafi leikið í heilli Hollywood-mynd á milli þess sem tökum lauk og myndin er frumsýnd,“ grínast Gísli með og bætir því við að þetta hljóti að vera besta dæmið um það hversu vandvirkir þeir hafi verið við eftirvinnslu myndarinnar. - fgg