Ferðin umhverfis jörðina farin að taka á

Sighvatur Bjarnason lagði af stað í ferðalag til styrktar Umhyggju fyrir tveimur vikum og ætlar umhverfis jörðina á 80 dögum. Lesendur Vísis hafa fylgst grannt með ferðalaginu enda sendir Sighvatur myndbönd af gangi mála þrisvar í viku.

Sighvatur skrifar einnig reglulega á Facebook-síðu verkefnisins en hann lenti í miklum vandæðum þegar hann hélt áfram frá Kenía, eins og sjá má í myndbandinu hér fyrir ofan.

„Ferðalag um þjóðvegi frá Kenía til Eþíópíu er hættulegt og í raun ekki boði. Ég átti um þrennt að velja: taka sénsinn (ekki góð hugmynd), aka langa leið um Úganda (ekki víst að ég fái vegabréfaáritun), eða fljúga beint til Addis Ababa, höfuðborgar Eþíópíu. Sá á kvölina sem á völina," skrifaði hann á Facebook-síðuna.

Sighvatur flaug því beint frá Naíróbí í Kenýa yfir til Addis Ababa í Eþíópíu. Þar voru móttökurnar ekki góðar og honum gert að yfirgefa landið innan sólahrings. Ríkisborgarar nær allra Vestur–Evrópulanda, Bandaríkjanna, Kína, Norðurlanda og fleiri fá vegabréfsáritun við komuna til landsins en ekki Íslendingar.

Sighvatur flaug því áfram til Djíbútí en var einnig vísað úr landi þar, þrátt fyrir að vera með alla pappíra í lagi. Hann grunaði landamæraverðina um að telja hann vera blaðamann og því neita honum inngöngu í landið.

Sighvatur neyddist því að fara aftur til Eþíópíu þar sem honum var aftur gert að yfirgefa landið innan sólahrings. Hann eyddi því nóttinni á gólfinu í flugstöðinni með Samönthu Fox í fanginu (í upphafi ferðar nefndi hann bakpokann sinn því nafni).

Þar var hann hirtur upp af útlendingaeftirlitinu og fulltrúa flugfélagsins sem skipuðu honum uppí næstu vél til Naíróbí. Vélin beið tilbúin til brottfarar og honum var fylgt úr hlaði með valdi.

Sighvatur lenti því aftur í Naíróbí í Kenýa, þar sem hann hóf þennan hluta ferðalagsins. Honum var þrisvar vísað úr landi á þremur dögum.

Hann dó þó ekki ráðalaus og fékk vegabréfsáritun til Jemen og bókaði flug til borgarinnar Sana. Þannig klárast Afríkuhlutinn en enn eru rúmir 60 dagar eftir af ferðalaginu.

Með ferð sinni vill Sighvatur hjálpa Umhyggju, félagi til stuðnings langveikum börnum, að láta þann draum verða að veruleika að eignast tvö sumarhús, sem sniðin eru sérstaklega að þörfum langveikra barna og fjölskyldna þeirra.

Til að styðja við Sighvat og byggingu sumarhúsanna hefur söfnunarsímum verið komið upp sem hægt að hringja í og leggja þá málefninu lið með peningaframlagi. Allur ágóði fer beint inn á sumarhúsareikning Umhyggju.

Söfnunarsímanúmerin eru þrjú:

s. 903-5001 til að gefa 1.000 kr.

s. 903-5002 til að gefa 2.000 kr.

s. 903-5005 til að gefa 5.000 kr.

Einnig er hægt að leggja valfrjálsa upphæð inn á bankareikning Umhyggju nr. 0101-26-311225, kt. 6910861199.