Náði umhverfis jörðina á 80 dögum

Ferðalag Sighvats Bjarnasonar hefur eflaust ekki farið framhjá lesendum Vísis síðustu mánuði. Í lok febrúar hélt hann af stað í ferðalag umhverfis jörðina til styrktar Umhyggju, félagi langveikra barna, og hefur hann reglulega sent Vísi myndbönd þar sem hægt hefur verið að fylgjast með framgangi mála. Sighvatur setti sér alls kyns krefjandi reglur, sem gerðu það að verkum að hann gat ekki leyft sér að hoppa á milli flugvéla heldur fór hann landleiðina að mestu.

Og það tókst. Sighvatur sendi Vísi í dag 26. og síðasta myndbandið af ferðalagi sínu. Hann er þar loksins kominn til Copacabana-strandar í Ríó á 80. degi eftir spennandi lokasprett þar sem munaði minnstu að áætlunin stæðist ekki.

Sighvatur er kampakátur með árangurinn en viðurkennir að hann nái ekki að átta sig á áfanganum. Þetta samfellda ferðalag með tilheyrandi flækjum hafi tekið á og verið býsna erfitt á köflum. Þó segir hann ferðina hafa að sama skapi gengið ótrúlega vel og upplifunina magnaða. Það hafi komið í ljós að 80 dagar séu passlegur tími til að ferðast í kringum jörðina með þessum hætti. Nú hlakki hann þó mest til að komast heim í íslenska vorið og hitta fjölskyldu og ástvini.

Þeir sem vilja kynna sér nákvæma leið ferðarinnar geta kíkt á kort sem Sighvatur hefur útbúið á vefnum Tripline. Enn er hægt að styrkja söfnunina en upplýsingar um hana má finna á vef Umhyggju.

Við hvetjum lesendur Vísis einnig til að senda Sighvati hamingjukveðjur á Facebook-síðu verkefnisins.