Veiði hafin á öllum svæðum Hreggnasa

Veiði er nú hafin í öllum ánum sem Veiðifélagið Hreggnasi er með á leigu og selur veiðileyfi í. Góð veiði hefur verið í Korpu og byrjunin í Svalbarðsá í Þistilfirði lofar mjög góðu. Gljúfurá í Húnaþingi var opnuð í gær og þar fékkst einn lax og nokkrar bleikjur. Rólegt hefur verið yfir veiðinni í Grímsá og Laxá í Kjós og Bugðu en menn eru vongóðir um að veiðin glæðist eftir stórstreymið nú um helgina og á morgun.

Jón Þór Júlíusson hjá Hreggnasa segir að nú hafi veiðst tæplega 30 laxar í Korpu en veiði hófst í ánni 23. júní sl. Það verður að teljast góður árangur í vertíðarbyrjun en veitt er á tvær stangir. Veiði hófst í Svalbarðsá sl. föstudag. Vanir menn, sem verið hafa í opnun árinnar í meira en áratug, voru við veiðar. Þegar þeir hættu á hádegi í dag höfðu fengist 11 laxar og var það allt stórlax. Aðstæður voru með erfiðara móti en mikið vatn er í ánni.

Að sögn Jóns Þórs hefur veiðin í Grímsá og Laxá í Kjós og Bugðu verið fremur róleg en áberandi batamerki hafa þó verið á veiðinni sl. tvo daga. Stærsti straumur er á morgun og menn vona að það muni skila sér í góðum laxagöngum í árnar.

Birt með góðfúslegu leyfi Hreggnasa