Edda Björgvins: Jólatrénu hent á aðfangadag

„Jólalögin. Platters og Elvis græta mig alltaf á aðventunni" svarar Edda Björgvinsdóttir leikkona þegar við forvitnumst hvað kemur henni í jólaskap.

„Það eru nokkur eftirminnilega jól í mínum huga," svarar Edda þegar talið berst að eftirminnilegum jólum.

„Ekki endilega góðar minningar," segir hún og byrjar að rifja upp misheppnuð jól.

„Samanber jólin þegar það var komið fram yfir miðnætti þegar við loksins gátum borðað jólamatinn. Það var smíðavinna í gangi til klukkan sex og eftir það tók við að þrífa og elda. Það voru erfið jól."

„Svo voru það jólin sem mig langaði til að útrýma köttum. Aðallega þó miðbæjarkattargenginu sem meig allan desember mánuð á jólatréð undir tröppunum heima hjá okkur," segir hún.

„Tréð sem ég hafði keypt óvenju snemma og hélt að væri vel geymt í kuldanum undir útidyratröppunum fram á aðfangadag," segir hún og heldur áfram:

„Við tókum það ansi seint inn á aðfangadag, eftir klukkan fimm, og það stinkaði svo hræðilega, þrátt fyrir marga lítra af rakspíra og ilmvatni, að við hentum því í tunnuna eftir miðnætti."

„Aðventuvinna mín að þessu sinni verður að fá að vera Grýla í Smáralindinni allar helgar fram að jólum," segir Edda spurð hvað hún tekst á við fram að jólum.

„Jólabarnaævintýri Smáralindar hefur undanfarin ár verið sérlega metnaðarfull dagskrá. Ótrúlega skemmtileg. Og nú fæ ég að vera með," segir Edda.

Aðfangadagskvöldið hjá þér í ár? „Það verður yndislegt. Við borðum lítil eining heima hjá mér," svarar Edda og segir áður en kvatt er:

„Svo kíkjum við í heimsóknir til afkvæmanna, það er öldruðu barnanna minna sem eru sjálf komin með heimili." -elly@365.is