Costner í Superman

Kevin Costner hefur undanfarin ár verið samnefnari fyrir sjálfumglaðar og vondar kvikmyndir. Það er sorglegt, því Costner átti frábæra spretti á níunda áratug síðustu aldar en gleymdi sér við að horfa á sjálfan sig.

Costner á þó von, því bandaríski kvikmyndagerðarmaðurinn Zach Snyder og snillingurinn Christopher Nolan eru nú að velta því fyrir sér að fá Costner til að leika stórt hlutverk í næstu Ofurmennismynd.

Það var fréttasíðan Collider sem greindi fyrst frá þessum áhuga á Costner en hún sagðist ekkert vita hvaða hlutverk nafn Costners hefði verið spyrt við.

Vefsíðan Latino Review birti hins vegar frétt á sinni vefsíðu um að Nolan og Snyder hefðu rætt sín á milli um að Costner léki fósturföður Ofurmennisins, Jonathan Kent.

Blaðamenn Empire Online skutu sér inn í fréttina í gær og sögðust ekkert hafa á móti Costner í hlutverkið; hann myndi smellpassa í hlutverk hins afslappaða og rólega Kents, sem missir ekki svefn yfir smáatriðum.