Angelina Jolie öfundsjúk

Brad Pitt hefur ítrekað sést í fylgd með konu úr tökuliði kvikmyndarinnar World War Z og hefur það valdið vangaveltum um ástand sambands hans og Angelinu Jolie.

Myndir hafa náðst af Pitt og óþekktu starfsstúlkunni við ólík tækifæri og samkvæmt OK! Magazine hefur Jolie sett sig upp á móti vinskapnum. „Brad er ekki hrifinn af því þegar Angelina reynir að stjórna honum og segja honum við hvern hann megi tala. Hann sagði hreint út við hana: „Ég hef alltaf átt vinkonur og mun alltaf eiga vinkonur." Hann endaði vinskap sinn og leikkonunnar Catherine Keener vegna Angelinu og hann ætlar ekki að leyfa henni að ráða aftur," var haft eftir innanbúðarmanni sem heldur því einnig fram að Jolie sé þjökuð af lágu sjálfsmati þrátt fyrir að vera ein fallegasta kona heims.

„Brad mundi aldrei viðurkenna það, en hann nýtur þess þegar Angelina verður afbrýðisöm. Yfirleitt er hún mjög afslöppuð og með mikið jafnaðargeð og sýnir ekki miklar tilfinningar. Honum finnst þetta vera tákn um að hún elski hann enn þá og hann hefur gaman af því."