Spila sorglegar ástarballöður

Kristín Lýðsdóttir og Dóra Dúna Sighvatsdóttir skipa plötusnúðatvíeykið SAD SAD SAD. Þær stöllur eru báðar búsettar í Kaupmannahöfn og þykja efnilegir plötusnúðar.

Vinkonurnar kynntust er þær voru sextán ára að aldri og tóku fljótt eftir því að þær höfðu svipaðan tónlistarsmekk. Þær mynduðu þó ekki SAD SAD SAD fyrr en í febrúar í fyrra og síðan þá hafa þær spilað víða í Danmörku og meðal annars komið fram á tónlistarhátíðinni Trailerpark Festival.

„Vinur okkar hafði heyrt okkur spila í einhverju eftirpartýi og bað okkur um að spila á barnum sínum stuttu síðar. Við auðvitað slógum til og eftir það hætti síminn ekki að hringja. Áður en við vissum af vorum við farnar að spila allt að þrisvar í viku. Okkur fannst það einum of mikið þar sem við erum báðar í fullri vinnu og tókum þá ákvörðun að spila frekar sjaldnar og þá á stöðum sem við elskum. Við viljum alls ekki vera „sell out"," útskýrir Dóra Dúna.

Nafngiftin er sprottin út frá lagavali stúlknanna en þær spila mikið af sorlegum ástarlögum sem eiga það til að gleymast innan um allt teknóið sem spilað er á skemmtistöðum í dag. „Nafnið kemur frá laginu D"yer Mak"er með Led Zeppelin en viðlagið er: „When I read the letter you wrote me, it made me mah mah mad. When I read the words that it told me, it made me sah sah sad". Við elskum báðar þetta lag," segir Kristín.

Þær stöllur segja viðtökurnar hafa verið glimrandi góðar og ætla þær að halda spilamennskunni áfram. Inntar eftir því hvort von sé á þeim heim til Íslands eru þær fljótar til svars: „Okkur langar mikið til Reykjavíkur að spila, enda báðar með mikla heimþrá. Okkur langar aðallega að spila á Dillon, Kaffibarnum eða Rauða ljóninu. Bókið okkur."- sm