Vilja heimsyfirráð á netinu

Vefsíðan Live Project ætlar að gera tónlistarhátíðinni Iceland Airwaves góð skil. Framtíðarsýn stofnenda síðunnar er að gera hana þá skemmtilegustu á netinu.

Það verður nóg að gerast á íslensku vefsíðunni Live Project í tengslum við tónlistarhátíðina Iceland Airwaves sem hefst í dag. Live Project er rauntíma myndbrota- og ljósmyndasíða þar sem allir geta deilt upplifun sinni í beinni útsendingu. Mennirnir á bak við hana eru Benedikt Freyr Jónsson, Hörður Kristbjörnsson og Daníel Freyr Atlason.

Um fimmtán manns starfa við síðuna meðan á Airwaves stendur til að fanga stemninguna á tónleikum. Mest áhersla er lögð á að taka upp efni með íslensku hljómsveitunum. Að auki eru gestir Airwaves hvattir til að setja á síðuna eigin upplifun af hátíðinni. „Það verður öllu safnað saman í tímaröð í beinni útsendingu og það geta allir tekið þátt með því að deila sínu efni,“ segir Hörður.

Live Project býður upp á þá nýjung á Airwaves að fólk getur leigt sér einkaherbergi á Kex Hosteli og farið þar í alvöru karókí. Fólkið er einnig hvatt til að setja skemmtileg karókí-myndbrot úr herberginu inn á síðuna. Á skemmtistaðnum Austur verður Icelandair með fjölmiðlamiðstöð og þar verða sýndar beinar útsendingar í gegnum Live Project. Sérstakt pláss fyrir vefsíðuna verður einnig á Visir.is.

Live Project hefur áður verið á Hróarskelduhátíðinni og á Popaganda í Svíþjóð.

„Það hefur verið rosalega vel tekið í þetta,“ segir Hörður. „Þetta er líka svo skemmtilegt. Það er gaman að horfa á þetta bæði á meðan hátíðin er í gangi og eftir hana.“

Spurður hvert Live Project stefni í framtíðinni segir hann: „Við viljum verða einu sinni til tvisvar í mánuði með útsendingar héðan og þaðan úr heiminum. Við stefnum á að vera hin eina sanna lýðútsendingarsíða hátíða.“

Hingað til hafa þeir félagar fjármagnað vefsíðuna sjálfir, með hjálp Símans, Icelandair og fleiri aðila. Þeirra von er sú að vefsíðan eigi eftir að festa sig í sessi úti um allan heim og meiri peningur komi þá í kassann.

„Við stefnum á að þetta verði okkar lífsviðurværi. Við stefnum á að gera þetta að skemmtilegustu vefsíðu internetsins. Það er okkar sýn,“ segir Hörður. „Ég er búinn að lofa stofnmeðlimi mínum Benz ef við myndum meika það. Daníel Freyr er mikill aðdáandi Benz og honum var lofað þessu í upphafi.“

Slóð síðunnar á netinu er Liveproject.me.

freyr@frettabladid.is