Bubbi gefur út iPad-bók

Eins og venjulega hefur Bubbi Morthens mörg járn í eldinum. Hann spilar um þessar mundir og syngur úti um hvippinn og hvappinn með Sólskuggunum en er jafnframt sestur við skriftir. Hann vinnur nú að nýrri veiðibók, sem verður óvenjuleg að því leyti að hún verður ætluð fyrir spjaldtölvur á borð við iPad.

Bubbi fetar þar í fótspor Tolla bróður síns, sem gaf út bók sína, Landslag hugans, í sérstakri iPad-útgáfu í vor. Bubbi er ekki ókunnugur bókum um veiði, því hann hefur áður skrifað bækurnar Áin og Að kasta flugu í straumvatn er að tala við Guð, auk barnabókarinnar Djúpríkisins, sem fjallar um ævintýri laxa.