Hugleikur tekur aftur fyrir erlenda stórsmelli

Hugleikur Dagsson hefur sent frá sér aðra Popular Hits-rassvasabók. Emilíana Torrini skrifar formála bókarinnar, en hún er einlægur aðdáandi Hugleiks.

„Það er gott að gera myndasögur á ensku, vegna þess að fólk mun alltaf kaupa þær. Það eru alþjóðlegir lesendur,“ segir skopmyndateiknarinn og uppistandarinn Hugleikur Dagsson.

Popular Hits II kemur út í dag, en hún fylgir eftir sams konar bók sem kom út í fyrra. Í bókunum teiknar Hugleikur myndir við þekkt erlend lög og leggur eigin skilning í merkingu þeirra. Hugleikur hefur einnig sent frá sér tvær sams konar bækur á íslensku sem nefnast Íslensk dægurlög.

„Mér skilst að Popular Hits eitt hafi selst stöðugt og seljist alltaf vel,“ segir Hugleikur spurður um sölutölur. „Hún hefur verið stanslaust á topp tíu listum í Eymundsson… eða Máli og menningu. Myndasögubækur eru miklu algengara lesefni erlendis heldur en hér.“

Emilíana Torrini skrifar formála Popular Hits II. Hugleikir segir að það hafi legið beinast við að fá hana, enda syngur hún á ensku og bókin tekur einmitt fyrir enska lagatitla.

En hafði hún eitthvað fallegt að segja um þig?

„Hún hafði gífurlega fallega hluti að segja.“

Kom það þér á óvart?

„Öhm. Nei.“

Þekkirðu hana?

„Nei, þekki hana ekki að ráði. Hún hefur keypt myndir af mér. Þannig að ég notaði tækifærið og bað hana um að gera eitt stykki formála. Hún hikaði ekki. Hún var meira en til í það, enda einlægur aðdáandi.“

Mynd sem Hugleikur teiknaði eftir laginu Anarchy in the UK fór á mikið flug í kjölfar útgáfu fyrri bókarinnar og dreifðist hratt um netheima. Óprúttnir aðilar reyndu að selja hana á bolum og á vefsíðunni 9gag.com birtast reglulega skopstælingar af myndinni. Spurður hvort hann búist við að mynd í nýju bókinni taki viðlíka flug segir hann erfitt að sjá það fyrir.

„Þetta er svo ófyrirsjáanlegt. Þessi UK-mynd var alltaf ein af mínum uppáhalds, en ég bjóst aldrei við að henni yrði dreift svona svakalega á myndavefjum,“ segir hann. Hann spáir því að myndin hér til hliðar, sem er teiknuð eftir frægu jólalagi, verði næsta mynd sem fer á flakk.

Hugleikur og Lóa Hlín Hjálmtýsdóttir, söngkona FM Belfast, kynna rassvasabækur sinar í bókabúð Máls og Menningar á morgun. Hún sendir frá sér bókina Generalizations about Nations, sem er ensk útgáfa bókarinnar Alhæft um þjóðir.

atlifannar@frettabladid.is