Cruise á toppnum

Eftir fremur magra tíð með kvikmyndum á borð við Lions for Lambs, Knight and Day og Valkyrie er Tom Cruise kominn aftur á toppinn.

Fjórða Mission:Impossible-myndin sló í gegn um jólahelgina og rakaði inn rúmlega 29 milljónum dollara. Sherlock Holmes: A Game of Shadows náði ágætis árangri og hafnaði í öðru sæti, með miðasölu upp á 20 milljónir dollara en hins vegar reyndist bandaríska útgáfan af Körlum sem hata konur vonbrigði helgarinnar en myndin náð eingöngu þriðja sætinu og miðasölu upp á rúmar tólf milljónir dollara.

Ævintýri Tinna náði heldur ekki miklu flugi í Bandaríkjunum, komst eingöngu í fimmta sæti listans með 9,7 milljónir í miðasölu en leikstjóri myndarinnar, Steven Spielberg, missir varla svefn yfir þeim árangri. Því Tinna-myndin hefur malað gull utan Ameríku og selt miða fyrir tæpar 240 milljónir dollara. - fgg