Margiela fyrir H&M

Sænski verslunarrisinn Hennes & Mauritz hefur flett hulunni af næsta hönnuðasamstarfi sínu en það er tískuhúsið Maison Marton Margiela sem hannar næstu gestalínu fyrir tískurisann. Línan á að koma í verslanir í byrjun nóvember og inniheldur tískufatnað og fylgihluti fyrir bæði herra og dömur.

„Masion Martin Margiela er eitt af stærstu og áhrifamestu tískuhúsum síðustu áratuga. Ég er virkilega spennt yfir samstarfinu sem gefur öllum tískuáhugamönnum tækifæri til að ganga í fatnaði frá Margiela," segir Margareta van den Bosch, yfirmaður hjá H&M.

Maison Martin Margiela er þekkt fyrir að fara óhefðbundar leiðir í hönnun sinni og því verður forvitnilegt að sjá hvernig til tekst að búa til fatalínu fyrir almúgann. Það var hönnuðurinn Martin Margiela sem stofnaði tískuhúsið á sínum tíma en sjálfur hvarf hann frá merkinu á árunum 2009. Enginn arftaki hans hefur ennþá verið kynntur en núna er hönnun merkisins í höndunum á ungu og fersku hönnunarteymi.