Kelly og Dylan féllu hvort fyrir öðru

Æskuástin blómstraði að nýju hjá Kelly og Dylan úr sjónvarpsþáttunum vinsælu, Beverly Hills 90201, ef marka má nýjustu fregnir.

Fataframleiðandinn Old Navy fékk leikarana Jennie Garth, Luke Perry og Jason Priestley til að koma fram í nýjum sjónvarpsauglýsingum og þar munu Garth og Perry hafa fallið hvort fyrir öðru.

Kelly og Dylan áttu í stormasömu sambandi í sjónvarpsþáttunum Beverly Hills sem sýndir voru á tíunda áratug síðustu aldar. Sjónvarpsáhorfendur fylgdust spenntir með framvindu mála og gengu í gengum gleði- og sorgarstundir með parinu. „Þau féllu strax hvort fyrir öðru. Það er mikil spenna á milli þeirra og hefur alltaf verið," hafði The National Enquirer eftir heimildarmanni.

Garth skildi nýverið við leikarann Peter Facinelli sem þekktastur er fyrir hlutverk Carlisle Cullen úr Twilight-kvikmyndunum.