Olís stígur enn eitt græna skrefið

Olís er fyrsta íslenska olíufyrirtækið sem blandar dísilolíu sína með VLO, eða vetnismeðhöndlaðri lífrænni olíu, sem er hreinna og umhverfisvænna dísileldsneyti en áður hefur þekkst.

Með þessari nýjung stígur Olís enn eitt græna skrefið en félagið hefur um árabil unnið skipulega að umhverfis- og uppgræðslumálum. Að sögn Jóns Ólafs Halldórssonar, framkvæmdastjóra smásölu- og eldsneytissviðs Olís, er framleiðsluaðferð VLO gjörólík annarri lífdísilolíu.

„VLO virkar fullkomlega eins og önnur dísilolía en mengar minna. Þessi olía hefur erlendis gengið undir nafninu HVO, eða vetnismeðhöndluð jurtaolía, en á næstu misserum mun dýrafita koma til sögunnar í auknum mæli og því kjósum við að tala um „lífræna“ olíu fremur en jurtaolíu.“

Jón segir VLO vera blandað í dísilolíu Olís sem hlutfall af seldu magni í samræmi við reglugerðir í Evrópu. „Það er ekki enn búið að setja slíka reglugerð hér á landi en við gerum ráð fyrir því að það muni gerast innan skamms. Íblöndunarhlutfall okkar skilar í heildina 5% minni koltvísýringsútblæstri dísilbifreiða.“

Það er vel hægt að nota hreina VLO á dísilvélar að sögn Jóns en með íblönduninni vill Olís stuðla að því að gera VLO samkeppnisfæra í verði á eldsneytismarkaðnum. „Íblöndunin hefur engin áhrif á verð og eykur ekki eldsneytiseyðslu viðskiptavina okkar. Hún dregur hins vegar úr koltvísýringsútblæstri og losun gróðurhúsalofttegunda.“

Hitaþolið eldsneyti

Ekki þarf að gera breytingar á dísilbílum eða endurstilla þá til að nota VLO. „Notkun VLO skilar sama afli og þolir auk þess mjög vel mikinn kulda og hita. Vandinn við hefðbundið lífdísil er að það getur þránað við geymslu. VLO býr ekki við það vandamál og því öflugt fyrir þær aðstæður sem við búum við hér á landi. VLO hefur verið prófað við köldustu aðstæður í Finnlandi og Kanada og reynst mjög vel.“

Vetnismeðhöndlun er nýstárleg aðferð við framleiðslu á lífeldsneyti fyrir dísilvélar. Hún er afrakstur vísinda- og þróunarstarfs hjá finnska olíufyrirtækinu Neste Oil að sögn Jóns. „Eingöngu er notað endurnýjanlegt eldsneyti úr umhverfinu, til dæmis ýmsar tegundir jurtaolíu, en einnig er ýmis dýrafituúrgangur frá veitingahúsum og sláturhúsum sem annars yrði hent. Þessi aðferð hefur skilað hreinni og umhverfisvænni vöru sem er laus við þau vandamál sem fylgt hafa annarri lífdísilolíu, eins og botnfall, þránun og bakteríumyndun.“

Metanstöð í byggingu

Olís undirbýr nú byggingu metanstöðvar á höfuðborgarsvæðinu sem gert er ráð fyrir að taki til starfa 1. júní næstkomandi. Unnið er að frágangi samnings við Sorpu sem gerir fyrirtækinu kleift að selja um 1.500 normal rúmmetra af metani á ári en metan er framleitt á sorphaugum Sorpu en þá myndast gas þegar úrgangur brotnar niður.

„Þetta er enn einn liðurinn í umhverfisstefnu okkar. Framleiðsla þess var boðin út fyrir stuttu síðan og áttum við hæsta boð. Olís mun selja það samkvæmt samkomulagi frá og með miðju ári.“ Bíleigendur geta breytt bílum sínum í metanbíla hérlendis hjá Íslenska gámafélaginu og einnig er hægt að kaupa nýja bíla hjá nokkrum bílaumboðum hér á landi sem ganga fyrir metani.

„Yfirleitt nota bíleigendur bæði bensín og metan á bíla sína. Notkun metans er ekki mjög útbreidd hérlendis en á vafalaust eftir að aukast. Í dag ganga ríflega 1.000 bílar hérlendis fyrir metani.“

Þrýstingur frá neytendum

Jón segir aukinn þrýsting vera frá almenningi um umhverfisvænna eldsneyti. „Olíufyrirtæki víða um um heim finna fyrir auknum þrýstingi frá neytendum um að í boði sé eldsneyti sem dregur úr mengun koltvísýrings. VLO er vissulega liður í þeirra þróun. Einnig skiptir máli í þessu samhengi að eldsneyti sé ekki framleitt úr einhverju sem hefur áhrif á matvælaframboð í heiminum. VLO er unnið úr dýrafitu eða olíu sem er ekki notað til matarframleiðslu og það skiptir miklu máli í víðu samhengi.“

Eins og fyrr segir er sala á VLO í dísilolíu enn eitt grænt skref sem Olís stígur. Olís hefur að sögn Jóns um árabil unnið skipulega að umhverfis- og uppgræðslumálum og haft það í stefnu sinni að standa vörð um náttúru Íslands.

„Umhverfisbaráttan hefur ekki eingöngu falist í styrkjum til ýmissa málefna á sviði náttúruverndar heldur einnig í daglegri starfsemi og þjónustu okkar. Með umhverfisstefnu okkar viljum við stuðla að því að hver kynslóð skili landinu og auðlindum þess í betra horfi en áður til þeirrar næstu.“