Góð bók og nart

Örlygur Smári var áberandi á fyrri hluta ársins eftir að lagið hans Ég á líf og Eyþór Ingi Gunnlaugsson fóru til Svíþjóðar í Eurovision-keppnina. Örlygur á mörg áhugamál fyrir utan lagasmíðar, hann er áhugaljósmyndari, hlaupari og svo finnst honum skemmtilegt að lesa bækur um jólin.



„Já, ég les yfirleitt mikið um jólin. Fátt finnst mér betra um jólin en að koma mér vel fyrir með góða bók og narta í afganga,“ segir hann.



Hver er skemmtilegasta jólabók sem þú hefur lesið?

„Þær eru svo margar. Hef reyndar alltaf haft meira gaman af ævisögum og sagnfræðibókum en skáldsögum. Mig minnir að ég hafi lesið Stasiland í fyrra eftir Önnu Funder og þótti hún mjög góð.



Hvaða bók langar þig að fá í jólagjöf um þessi jól?

„Ég hef ekki kynnt mér nógu vel hvað er að koma út fyrir þessi jól. Á reyndar helling eftir að lesa af bókum sem ég keypti á bókaútsölu í Svíþjóð. Væri alveg til í góðan reyfara þessi jól, verst að vera búinn að lesa allar Wallander-bækurnar.“



Það verða örugglega bókajól hjá Örlygi Smára en búast má við að hann fái líka gott að borða því kona hans, Svava Gunnarsdóttir, heldur úti vinsælu matarbloggi á netinu sem kallast Ljúfmeti og lekkerheit.