Tilkynntu ekki um flugvél á ratsjá taílenska hersins

Ókunn flugvél birtist á ratsjá taílenska hersins örfáum mínútum eftir að farþegaþota Malaysia Airlines sem nú er saknað missti samband við flugturn þann 8. mars. Herinn veitti malasískum yfirvöldum ekki upplýsingar um atvikið fyrr en nú vegna þess að ekki var beðið sérstaklega um það.

AP greinir frá þessu og hefur eftir talsmanni taílenska flughersins að vélin hafi verið á flugi yfir Malaccasundi. Þessar nýju upplýsingar eru sagðar hjálpa lítið við leitina að vélinni en vekja spurningar um samvinnu þjóða þegar mikið liggur við.

Aðspurður hvers vegna upplýsingarnar bærust svona seint sagði talsmaðurinn að enginn hefði veitt þessu sérstaka athygli. Flugherinn fylgdist aðeins með hlutum sem taldir væru ógn við þjóðaröryggi.

Talsmaðurinn sagði vélina aldrei hafa flogið inn í taílenska lofthelgi og að fyrirspurn malasískra yfirvalda hefði verið ónákvæm. Þegar þeir hafi spurst fyrir á ný hefði málið verið skoðað nánar.