Skuldir endurfjármagnaðar og mat bætt

Lánshæfismat Hafnarfjarðar hefur verið hækkað um tvo flokka og stendur í BBB1 með stöðugum horfum. Fulltrúar Reitunar kynntu nýtt mat á fundi bæjarráðs í gær.

Að sögn Guðrúnar Ágústu Guðmundsdóttur, bæjarstjóra í Hafnarfirði, kemur nýtt mat í kjölfar endurfjármögnunar á skuldum bæjarins, en Íslandsbanki hefur boðið bænum að endurfjármagna allar skuldir sveitarfélagsins í íslenskum krónum. Um er að ræða endurfjármögnun á erlendum lánum hjá þýska bankanum FMS (áður Depfa). 

Þá er endurfjármögnunin, í tilkynningu, sögð koma til með að lækka greiðslubyrði og minnka gjaldeyrisáhættu sveitarfélagsins, sem styrki fjárhagsstöðu þess.



H.F. Verðbréf veittu sveitarfélaginu ráðgjöf við endurfjármögnunina.

„Á kjörtímabilinu hefur núverandi meirihluti Vinstri grænna og Samfylkingar unnið að endurskipulagningu á rekstri sveitarfélagsins og hefur sú vinna verið lykillinn að þeirri endurfjármögnun sem nú hefur verið tryggð með lánsloforði Íslandsbanka allt að 13 milljörðum króna,“ er haft eftir bæjarstjóra í tilkynningunni.